सुजुकी eVitara नेपालमा रु १ लाखले सस्तो, सुरुवाती मूल्य अब रु ४८.९९ लाख

सीजी होल्डिङ्स अन्तर्गत नेपालका लागि सुजुकी अटोमोबाइल्सको आधिकारिक वितरक सीजी मोटोकर्प प्रा.लि. ले सुजुकी eVitara का सबै भेरियन्टमा रु १,००,००० मूल्य घटाएको घोषणा गरेको छ। यो निर्णय नेपाल सरकारले विद्युतीय सवारीसाधन मा लागू गरेको नयाँ भन्सार तथा कर संरचनापछि आएको हो। 

नयाँ मूल्य समायोजनपछि सुजुकी eVitara को सुरुवाती मूल्य अब रु ४८,९९,००० पुगेको छ, जुन Delta भेरियन्टका लागि लागू हुन्छ। त्यसैगरी Zeta भेरियन्टको मूल्य रु ५२,९९,०००, Alpha भेरियन्टको मूल्य रु ५८,९९,००० र टप-स्पेक Alpha DT डुअल-टोन भेरियन्टको मूल्य रु ५९,४९,००० तोकिएको छ। कम्पनीका अनुसार यो नयाँ मूल्य तत्काल लागू भएको हो र नयाँ बुकिङ तथा अझै डेलिभरी नभएका सबै अर्डरमा समेत लागू हुनेछ।

सुजुकी eVitara को Delta भेरियन्टमा ४९ kWh ब्याट्री प्याक र १०८ kW इलेक्ट्रिक मोटर जडान गरिएको छ, जसले करिब ४४० किलोमिटर रेन्ज दिने दाबी गरिएको छ। यसमा सात एयरब्याग र Vehicle-to-Load (V2L) सुविधा पनि उपलब्ध छ। Zeta भेरियन्टमा ठूलो ६१ kWh ब्याट्री र १२८ kW मोटर प्रयोग गरिएको छ, जसले एक पटकको फुल चार्जमा करिब ५४३ किलोमिटर रेन्ज प्रदान गर्ने कम्पनीको दाबी छ।

Alpha भेरियन्टले Zeta को पावरट्रेनलाई निरन्तरता दिँदै थप प्रिमियम सुविधाहरू जस्तै भेन्टिलेटेड सिट र एम्बियन्ट लाइटिङ प्रदान गर्छ। टप भेरियन्ट Alpha DT भने Alpha कै सबै विशेषतासहित डुअल-टोन डिजाइन र थप प्रिमियम एक्सटेरियर तथा इन्टेरियर प्याकेजसहित उपलब्ध छ।

eVitara सुजुकीको HEARTECT-e प्लेटफर्ममा आधारित छ, जसको ह्वीलबेस २,७०० मिमी रहेको छ। यसमा Level 2 Advanced Driver Assistance System (ADAS) र 5-स्टार Bharat NCAP सुरक्षा रेटिङ जस्ता महत्वपूर्ण सुरक्षा तथा प्रविधि फिचरहरू समावेश छन्। सबै भेरियन्टमा Vehicle-to-Load (V2L) सुविधा पनि उपलब्ध छ, जसले बाह्य उपकरणहरूलाई सिधै गाडीबाट पावर आपूर्ति गर्न सक्षम बनाउँछ।

CG मोटोकर्पले eVitara नेपालभरका २५ वटा शोरुम र ४० वटा सर्भिस सेन्टरमार्फत उपलब्ध हुने जनाएको छ। कम्पनीका अनुसार ईभी-प्रशिक्षित प्राविधिकहरू सबै लन्च लोकेसनहरूमा ग्राहक सहायता तथा सेवा उपलब्ध गराउन तैनाथ गरिएको छ।

कम्पनीले यो रु १ लाख मूल्य घटाउने निर्णय कुनै प्रचारात्मक अफर नभई सरकारको कर संरचना संशोधनपछि आएको वास्तविक लागत समायोजन भएको स्पष्ट पारेको छ। नेपालमा ईभी बजार विस्तार भइरहेका बेला यो नयाँ मूल्यले सुजुकी eVitara लाई आफ्नो सेग्मेन्टमा अझ प्रतिस्पर्धी बनाउने अपेक्षा गरिएको छ।